काठमाडौं — त्रिभुवन विश्वविद्यालय (त्रिवी) ले यस वर्षको दीक्षान्त समारोह पुस १० गते आयोजना गर्ने भएको छ। विश्वविद्यालय प्रशासनका अनुसार दीक्षान्त समारोहमा करिब १६ हजार विद्यार्थी सहभागी हुँदैछन्, जुन विगतका वर्षको तुलनामा उल्लेख्य रूपमा ठूलो संख्या हो।
यसपटक स्नातक, स्नातकोत्तर, एमफिल तथा विद्यावारिधि तह उत्तीर्ण गरेका विद्यार्थी दीक्षित हुनेछन्। ठूलो संख्यामा विद्यार्थी दीक्षित हुन लागेकाले त्रिवीले दीक्षान्तलाई विशेष महत्वका साथ सम्पन्न गर्ने तयारी गरेको जनाएको छ।
विश्वविद्यालयका अनुसार दीक्षान्त समारोहलाई व्यवस्थित र सुरक्षित बनाउन व्यवस्थापन, सुरक्षा, आगमन तथा बसोबाससम्बन्धी तयारी तीव्र पारिएको छ। विद्यार्थी र अभिभावकको उपस्थिती धेरै हुने भएकाले परिसरभित्र तथा बाहिर सुरक्षा व्यवस्था कडा बनाइने बताइएको छ।
दीक्षान्त समारोहमा विश्वविद्यालयका पदाधिकारी, विशिष्ट अतिथि तथा शिक्षाविद्को उपस्थिति रहनेछ। समारोहका क्रममा उत्कृष्ट विद्यार्थीलाई पदक तथा प्रमाणपत्र प्रदान गरिने कार्यक्रम पनि समावेश गरिएको छ।
देशकै पुरानो र ठूलो विश्वविद्यालयका रूपमा परिचित त्रिभुवन विश्वविद्यालयको दीक्षान्त समारोहलाई शैक्षिक क्षेत्रको महत्वपूर्ण कार्यक्रमका रूपमा लिइन्छ। यस वर्ष ठूलो संख्यामा विद्यार्थी दीक्षित हुनु उच्च शिक्षाबाट उत्पादन भएका जनशक्तिलाई औपचारिक रूपमा समाजमा प्रवेश गराउने महत्वपूर्ण अवसर हुने विश्वास विश्वविद्यालयले व्यक्त गरेको छ।